Ө Ө Ө

2- على الطريق وش غربه

وخطو مالوهش صاحب

والوقت ميت ف تربه

والتربه ماليها صاحب

3- مشيت معاه كان صديق

رسينا على كل شي

صديق وجاع في الطريق

هبش في لحمي الني

4- القهوه زى الديار

عريانه من غير وش

طفحت هموم النار

على كل وش يبش

5- بيتنا أهه يا ولاد

في وش بنت غريبه

في عينها زهر الميلاد

والموت وله تكعيبه

6- جايه منين يا قله

من حجر طينه قنا

كيف العيون والغله

عطشانه زي أنا

7- حرام يا قاضى العشق

مين حرموا وتابوا

موالي م الارض شق

وقصفوا رقابه

8- لا شي باقي ودايم

يا حلم أمي وخيه

القش هو اللي عايم

ونا وزماني في خيه

9- بافر من تحت جلدي

وأهرب وألف وأدوب

الود أشرب بيدي

نبع الشروق والغروب

10- يا نخل مالها جدورك

في الأرض مالهاش مخالب

جيتك لحدك أشورك

رجعت مغلوب وغالب

11- لا برق إلا وطالع

من بطن أم السكون

العتمه شايفه المطالع

والفجر من غير عيون

12- سفر وحلم وسفر

الخلق بتقول يا دنيا

الشهر أصبح صفر

بين الصباح والعشيه

13- طلقوني جوه الدروب

وف قلبى ندعه حليب

بين الشروق والغروب

إزاى يا ولد تشيب

14- لاتنين سوا لاتنين

البذره ويا الحصاد

الفجر أبيض جنين

والموت شهاده ميلاد

16- مش طايقه ليه خلقاتك

خلقاتي ضاقوا عليه

مش عارفه ليه شققاتك

رموني للغربه ديه

17- يا فكر خلي يا شارد

ياللي مالكش بلاد

التوهه سكين بارد

على رقاب العباد

18- سيبوني أمشى لوحدى

سيبونى أتوه عريان

الدنيا توب على قدي

وما اطقش أنا الغطيان

20- ياما قصص وحكايات

فاتوها ناس للزمان

لها روح مع جناحات

لها عين وودن ولسان

21- الصرخه في القلب جوع

تخلق ربيع أو خريف

ورده في صدر الربوع

دمعة فقير ع الرغيف

22- فيه طير بيرجع لعشه

وطير بيفضل مسافر

وطير ماهوش لاقي قشه

وطير مهاجر مهاجر

24- ده دم مين يا خال

حنه فى كفوف النسا

ولا جنين خيال

في بطن أمه اتنسى

25- يا ماشي ع الأرض هدي

دي الأرض أم حنونه

تولد وتحزن وتدي

تنفر من اللي عادونا

26- عرفت عتبات بيوت

لكن ما خطيتهاش

ودقت ياما الموت

والقلب برضك عاش

27- فيه طلق تجار حروب

وطلق يحمي الديار

وطلق يحمي دروب

وطلق يزرع عمار

28- فيه طلق يولد حياه

أطفال في عمر أساه

وطلق أسود أساه

مدفع بيقتل رضيع

31- بردانه ليه يا شمس

والخلق خلقاتها ضاقت

والنفس مش لاقيه نفس

والخطوه ع السكه دابت

32- سواقى دايره وسواقي

بتصحى أنات جدي

باقيه وماحد باقي

والميه جاريه فى أرضي

33- يا بحر دنياك وسيعه

ومالكش أبداً بلد

فيك الهلاك والوديعه

ياروح وعين وجسد

34- أنا غنوه مش لاقيه قلب

مش عايزه في الضل أموت

خدوني كسوه ودرب

شبابيك تستر بيوت

35- يا ميه النيل يا رايقه

جواكي سر غميق

حواليكي ساقيه وسايقه

سايقه الدموع ع الغريق

36- يا صرخه القلب كوني

كوني يا صرخه شموس

واوعي يا صرخه تهوني

تهون معاكي النفوس

37- يا أرض مين يسمعك

فيكي عذاب واعر

مين اللي شال مدمعك

غير ولدك الشاعر

38- إن لم نشد الرباب

ونكون لسان الفقير

ونكون بشر في الغاب

حايضل بينا المسير

39- ع السدر وشم أبو زيد

في الكف سيف الشهامه

ع الأرض دم الشهيد

نابض ليوم القيامه

40- يا مسكة الطيب يا أمي

يا أم الودع والحكايه

يا كون بيجري في دمي

يا سكه بتصون ورايا

42- لو يسألوكى عليه

قولي ده ولد الشقا

شب وكبر بين إيديه

واتعلم الزقزقه

43- محلا ثيابك يا زهرة

ف الصبح زاهي عبيرك

بيجي المسا تبقي ذكرى

والدنيا صارت لغيرك

44- أمي يا بذره حنان

يا أصل كل البشر

في كل حته ومكان

بلاقي ليكي أثر

46- فيه فكر عايش مهاجر

زي الطيور الجريحه

وفكر ميت وقادر

يجعل حياتنا مريحه

47- زارنى في عز النوم

قلتله بالحضن يابا

قاللي سلامتك قوم

سايبك يا ولدي في غابه

48- قاللي سلامتك سلامه

ياللي أنا منك ومني

أنا مشيت بالسلامه

لكن في تعبك قالقني

49- ماشي ولابس عبايتك

والكلمه لما تقولها

إرتاح يابويا في منامك

والدنيا سيب لي حمولها

50- لقلت م النوم .. صحيت

حسيت باني في شده

فينك يابويا مشيت

يا حلم أخضر وعدي

51- بره القفص زقزقه

زقزق يا طير القلب

الدنيا مش ضيقه

لو بس تعرف تحب

52- كان لي شادوف لقاي

ع المي كان ملهوف

في قلبي رجع الناي

على مين يا ... بتلوف

53- أنا والطريق والناس

ماشين نزاحم الأرض

اخرتها نفس الكاس

بنشربه مع بعض

54- ع الحجر لسه وليد

وشاب ع الدرب شايب

دنيا تنهنه بإيد

وإيد كمثل المغارب

55- الدنيا دارنا وإيد ؟

منها يا عبد تزيد

مانتش ملكها وليه

تقول : وهل من مزيد

57- يا راحل ونا في مكاني

أدوب ومش لاقى حد

ربك مالوش رب تاني

هوه الجواب والرد